ثقافة الممثلة رانية القابسي تكشف حقيقة الحكم الصادر ضدها بـ49 سنة سجنا.. وتقول لست بابلو اسكوبار..
نفت الممثلة رانية القابسي ماراج من أخبار على مواقع التواصل الاجتماعي بخصوص وجود حكم قضائي صادر في حقّها يقضي بسجنها لمدّة 49 سنة لإصدارها شيكات دون رصيد. وقالت رانية أنها منتجة وفنانة وليست Pablo Escobar أو إرهابية أو تاجرة سلاح أو مخدرات حتى يصدر ضدها مثل هذا الحكم. وشرحت رانية المصاعب التي تعرضت لها في المنشور التالي:
"أنا خدمت مسلسل "سكووول" و تحملت مسؤلية مجموعة كاملة من أصحاب وخوات لمينا بعضنا وقتها شباب مبدعين وعملنا "سكوول" إلي يضحك فيكم و في صغاركم..
من خمسة سنين تشجعت و حليت شركة إنتاج سينمائي قائمة الذات أمن بيا سي العربي نصرة ربي يفضلوا و اعطاني فرصة و بثلي "سكوول" في حنبعل و وقفوا معايا مستشهرين تنجموا تشوفوهم في جينريك و عاوني زادا ولاد سي عربي نصرة محمد حمدي نصرة و سي مهدي نصرة بمبلغ مالي بش نجمت نكمل التصوير إلي دام ستة جمعات..
لكن الزهر ما مشاش معانا و صار حداد في تلافز بعد حلقتين من "سكوول"، الحداد إلي صار على الشهيد البراهمي و الشهداء إلي توافاوا في الشعانبي ربي يرحمهم قررنا عدم بث "سكوول" عامتها خاطر لا أنا لا حنبعل تنجم تتحمل مسؤلية 6 حلقات من غير إشهار...
و مبعد عام هزيت "سكوول" لسي عبد لحميد بن عبدالله بش يتعدا "سكوول" في تونسنا t.v ما دخلوش فيه مستشهرين لسوء الحظ...
تصبوا الشيكات و قعدت نخلص بشوية بشوية في لعباد إلي هوما برشة منهم من ممثلين و تقنيين كانلهم سكوول بداية مشرفة ليهم و إنطلاقة قوية في دومان متاعنا...
مبعد خدمت الجزء الثاني "سكووول 2" كنت فيه منتجة منفذة و يعطيهم الصحة التلفزة Tunisia M هذا شنوة خلاني نجم نخلص برشة ممثلين و تقنيين و قعدت نخدم على روحي و نسلك في أوموري بشوية و بالسترة خاطر أنا نخدم في الفن و وحدي مانيش غنية و ندز فيهم بالركبة أنا يعني عندي مشاكل شيكات أما لحكاية موش بالكبر هذا و موش بالخطورة هاذي و نقلكم حاجة نتحدا أي تونسي توا ما عندوش مشاكل فلوس و إلا ضروفو صعيبة أنا قاعدة نخدم و في بلادي و نخدم في أولاد بلادي و منهم برشة فنانين و حكاية قديمة و قاعدة نلقى في حلول وحدي و معايا كان ربي و هاني ناقف فيها المحكمة في قسم الشيكات و نأكدلكم إلي برشة برشة منكم عندهم مشاكل شيكات ...
حاسيلوا أنا لاباس و بربي نقصوا من تلكليك راني نخدم و ربي يعطيني القوة بش ما يصيرلي حتى ضرر برضاية والدية ربي يفضلهم و سامحني ماما و سامحني بابا و خواتي و عائلتي و سامحوني صحابي و لعباد إلي تحبني بالحق على الفجعة الكبيرة إلي كليتوها عالصباح ...
و حسب الله و نعم الوكيل في كل عبد يجري في جرتي بالضرورة و كل إنسان تشمت فيا أهوكَ ربي فوقنا الكل خاطر الفال المشوم حرام عالصباح أنا لا سرقت لا نهبت لا فكيت لا فسدت لا قلبت أنا حلمت حلمة في بلادي و قاعدة نحاول نقدم و ننجح بنظافة و شرف و فن و ربي يوفقني كلامات هاذي ما تمسخنيش بالعكس تخليني نزيد نشد صحيح و نتعب و نخدم بش نكمل نفض مشاكلي الكل...
أما 49 سنة مش برشة على حكايتي هاذي أنا منتجة فنانة مانيش Pablo Escobar و مانيش إرهابية و مانيش نتاجر في السلاح و إلا في المخدرات...
نحبكم توا تسمعو و تفلتو"
